sullumbull og bullumsull

Nú ætti ég að drífa mig út að hlaupa og hressa mig við eftir hvítahveitissjokkið sem helltist yfir mig eftir croissantið í Teogkaffilaugavegiheimsókn morgunsins.

Eða kannski ætti ég að fara og kaupa meiri málningu og klára að mála garðhúsgögnin mín fáránlega appelsínugul.

Eða kannski ætti ég að standa við stóru hugsanirnar um vorhreingerningu sem eru búnar að virka svo vel sem afsökun fyrir ótiltekt vetursins.

Eða kannski ætti ég bara að ná mér í gervihressleika með heimalöguðu teogkaffilaugavegikaffi og sitja hér áfram og reyna að vera sniðug og skemmtileg því guð veit að það er langt síðan hér hefur birst mannsæmandi færsla.

Já er það ekki bara? so here goes, þessi átti eiginlega að koma í byrjun vikunnar:

Dívan group kynnir!:

Ráðleggingar hinnar stórfenglegu stjörnu Vælu Veinólínó um hvernig ekki skal líta illa út í Bikiníi í sumar (for english speaking fans: The Væla Veinólínó superdiet - how to not behave for a brilliant bikinisummer!)

Númer eitt: Ekki skal bjóða ættingjum í mat.

Númer tvö: Einstaklega óheppilegt er að afþýða rækjur og varast skal að blanda saman niðursoðnum perum, gráðaosti og sýrðum rjóma og sulla yfir. Ei skal setja yfir þetta svartan kavíar, rista með því brauð og skvetta hvítvínslögg í glas og setja hjá herlegheitunum.

Númer þrjú: Forðist að fá 1.7 kílóa paragúíska nautalund frá tengdaföður ykkar. Því síður skulið þið eignast bókina Hvernig étið skal eftir Nýgellu nokkra sem búsett er einhversstaðar á hinu stóra Bretlandi. Í henni er afskaplega óbikinívæn uppskrift af sósu sem kennd er við BERnharð EYSteinsson frá Stóra Hvoli í Hrunamannahreppi en var hann annálaður smjörstrokkari og fáfnisgrasræktandi. Ekki borgar sig að hita með þessu kartöfluskífur í ofni og enn síður er ráðlegt að steikja grænmeti á borð við sveppi, paprikur og rauðlauk og bera fram. Rauðvín er afskaplega óhentugur drykkur með þessum mat.

númer fjögur: Varast skal að mylja makkarónukökur í eldfast fat og ýra yfir þær appelsínusafa. Forðist í lengstu lög að skera niður vínber (græn og blá) og jarðarber og skafa út kantalópu og þrífa bláber og setja yfir makkarónugrautinn. Ennfremur er einstaklega heimskulegt að geyma þetta í ískáp í svolítinn tíma og taka svo út og dreypa yfir samanbræddu Lindu appelsínusúkkulaði/rjómaslettu. Látið svo alveg eiga sig að þeyta restina af rjómapelanum og bera fram með ásamt góðu kaffi og jafnvel líkjör.

Ef farið er eftir þessum örfáu einföldu ráðum er nokkuð víst að ekki verði þörf á illri líðan á rímíníströnd sumarsins!

Og lýkur nú bulli dagsins. Ég er farin að hella mér upp á kaffi og svo er ég farin í Brynju í málningarkaup. Verð að gera eitthvað af viti.